KORONADAL CITY – Nagapadayon ang damage assessment sang Municipal Disaster Risk Reduction and Management Office (MDRRMO) sa malapnagon nga damyos sang pagpanalasa sang flash flood kag buhawi sa banwa sang Lake Sebu, South Cotabato.
Ini ang ginpahayag ni Mayor Floro Gandam sa eksklusibo nga interbyu sang Bombo Radyo Koronadal.
Suno kay Gandam, lubos nga naapektuhan ang yara sa walo ka resort kag tourist attraction sa Sitio Lobo, Barangay Ned sa nasambit nga banwa.
Mangin ang dalan padulong sa nasambit nga lugar ang indi passable sa subong bangud sa flash flood kun diin naka-standby man ang heavy equipment agud nga makay-o kag mangin passable ini liwat.
Nahibaluan nga naguba ang dalagko nga concrete pipes nga ginaagyan sang tubig sa Sitio Lobo rason nga nag-awas ang tubig-baha nga nagtuga sang flash flood kag naapektuhan ang mga residente sa lugar.
Sa interbyu naman sang Bombo Radyo kay Mr. Isidro Sumagaysay, sa isa sa mga apektado nga resort owner, ginpahayag sini nga halos lampas tawo ang tubig baha nga ila nga naeksperiensiyahan kun diin gin-anod ang duha ka cottage nila kag kitchen sang mga ini.
Nagapasalamat na lamang ini nga wala sang naanod nga tawo sa nagluntad nga flash flood nga may dala nga mabaskog nga hangin.
