Duha ang patay kag duha pa ang pilason sa nagluntad nga ambush sa Barangay Paigoay sa Marogong, Lanao del Sur sang Sabado, Disyembre 7, 2024.
Ginkumpirma sang Domingo ni Brig. Gen. Romeo Juan Macapaz, direktor sang Police Regional Office-Bangsamoro Autonomous Region, ang kamatayon sa ambush sang retirado nga pulis nga si Solaiman Alibasa kag ang iya kaupod nga si Hadji Asrap Sandab.
Suno kay Macapaz sang Marogong Municipal Police Station, sakay sang pula nga Toyota Innova sanday Alibasa kag Sandab kag tatlo pa ka mga kaupod, nagapadulong sa banwa sang Malabang sa Lanao del Sur, sang ginpusil sila sang mga lalaki nga nakapuwesto sa kilid sang highway sa Barangay Paigoay, isa ka liblib nga lugar sa Marogong.
Tatlo pa ka mga sakay sang Toyota Innova nga ginpusil sang mga armado, sanday Sanaoray Alibasa, Sarpia Mangayao kag Ramil Bao, nga isa man ka retirado nga pulis, ang pilason kag gilayon nga gindala sang mga barangay emergency responders kag mga pulis sa balay bulolngan.
Sa karon, padayon gihapon ang pag koordinar sang mga opisyal sang Lanao del Sur Provincial Police Office sa mga local executives sa probinsya sa pagkilala sa mga suspek sa pag-ambush agud mapasakaan gilayon sang mga nagakaigo nga kaso.
