Ginapamatukan sang grupo sang mga manunudlo ang ginaduso sa karon sang Senado nga pagdumili sa paggamit sang gadgets sang mga estudyante sa sulod sang eskwelahan.
Suno kay Vladimer Quetua, Chairperson sang Alliance of Concerned Teachers, makabulig ang gadgets sa pagtuon sang mga kabataan ilabi na nga mahimo na subong mapasa kag mabasa ang mga leksyon sa cellphone nga kabaliskaran naman sa pagpati sang pila ka mga senador.
Dugang pa sini, daku man ang mabulig sang cellphone para sa mas madasig nga pag-review kag pag-research sang mga estudyante sang ila mga leksyon.
Ginhatagan man sang pagtamod ni Quetua nga may ara man sang memorandum ang Department of Education nga nagabawal sa paggamit sang cellphone sa classroom gani indi na kinahanglan pa suno sa iya nga magdihon sang layi para diri.
Pahayag pa sini nga imbes nga ibawal, mas dapat pa nga suportahan sang gobyerno ang pag-angkon sang access sa internet kag mga gadgets nga makabulig para sa mas madasig nga pagkuha sang impormasyon kag pagpabaskog sang sistema sang edukasyon sa pungsod.
