KORONADAL CITY- Nagtuga sang kahadlok sa mga residente sang isa ka banwa sa Sultan Kudarat ang pagpangharass kag pagpanghadlok sang mga armado nga grupo sa Sitio Kolosoy, Lagubang Village, Senator Ninoy Aquino, Sultan Kudarat.
Suno kay Lt/Colonel Harold Cabunoc, 33rd Infantry Batallion Philippine Army commanding officer, yara sa masobra 15 ka mga armado nga kalalakihan nga may bitbit nga mga matag-as nga kalibre sang armas luthang ang nagpanghadlok sa mga residente kadungan sang pagpangawat sang mga sapat sang mga ini.
Gilayon naman nga nagresponder ang mga suldado sa lugar apang wala nila naabtan ang mga armado nga kalalakihan matapos magpalagyo sang makita ang mga nagapadulong nga militar.
Sa subong, ginahibalo pa kun ano ang grupo sang mga ini.
Una na nga nareport nga may mga grupo suno pa sang BIFF nga nagapanago sa lugar kag plano nga magpatigayon sang kalakasan.
Ginpasiguro naman sang 33rd IB Philippine Army nga hugot ang ila ginapatuman nga seguridad sa lugar.
