Nagpaathag ang pamunuan sang Green Valley College Foundation of Marbel sa syudad sang Koronadal nga wala naka komiter sang anu man nga paglapas ang ila nga buluthuan makaligad nga naghiwat ang mga ini sang klase sang Lunes Nobyembere 20 2023 makaligad ang nagluntad nga magnitude 6.8 nga linog sang naglabay nga biyernes Nobyembre 18 2023.
Sa ekslusibo nga interview sang Bombo Radyo Koronadal sa Presidente sang Green Valley College Foundation nga si Atty. RJ Sustiguer ginpahayag sini nga madasig nga nagpatuman sang assessment kag checking ang ila nga pamunuan sa ila nga establisimeinto agud nga masiguro nga maayo kag lig-on pa ang mga ini.
Ginpahayag man sini nga naintendihan sini ang kaundan sang ginpaguwa nga Executive Order number 68 series of 2023 ni Koronadal City Mayor Eliordo Bebot Ogena sa diin tuyo man sang nasambit nga kamanduan nga ipasiguro nga luwas ang mga estudyante kag mga indibidwal nga ara sa idalom sang mga panalgan sang mga eskwelahan.
Dugang pa sini nga sala ukon mali ang impormasyon nga nahauna nga naguwa nga face to face ang ila nga klase bangud online ini kag asynchronous kabangdanan nga wala sini mabayolar ang kamanduan sang alkalde.
