Makatilingala ang natabo sa isa ka tigulang didto sa pungsod China.
Ini bangud wala man lang nabutang sa peligro ang iya kabuhi apisar nga 20 ka tuig na sini nga ginagamit sa pagmartilyo ang isa ka granada.
Suno sa mga otoridad, natukiban sang isa ka tigulang sa Xiangyang, Hubei province sa China ang isa ka “metal lump” nga may kahoy nga handle kag gingamit niya ini nga pangpanday, pagbuka sa “nuts” kag pagdunot sang mga katumbal.
Ulihi na natukiban sang kapulisan nga ang nasambit nga metal lump, delikado bangud isa gali ini ka granada.
Matapos mapamatud-an nga granada ini, nagpatigayon sang operasyon ang demolition team kun diin ginsulod ang panimalay ni Lola Qin kag ginkumpiskar ang granada.
Indi pa kuntani magpasugot ang tigulang apang wala na ini sang mahimo bangud may dako nga posibilidad nga maglupok ini kag mabutang sa katalagman ang iya kabuhi.
