KORONADAL CITY – Wala na nakalab-ot pa sa graduation day ang isa ka senior high school student matapos makuryente-patay sa Barangay New Lambunao, Tantangan, South Cotabato.
Ginkilala ang biktima nga si CJ Legurpa Cordero, 18-anyos, graduating student sa senior high school, kag residente sang nasambit nga lugar.
Suno sa pamilya sang biktima, nagatakod sang suga si CJ sa ila nga kaingod kun diin aksidente ini nga nakuryente.
Gindala pa sa hospital ang estudyante apang ginbawian man sang kabuhi.
Lubos naman ang kasubo sang pamilya sini bangud maga-gradwar na kuntani ini sa Mayo 29, 2024 sa kurso nga cookery sa New Lambunao Integrated School.
Kaangot sini, nagpahanumdom naman ang mga otoridad sa tanan nga siguruhon nga nagapatay ang kuryente sa tion nga magkay-o sang suga agud malikawan ang kasubong nga insidente.
