NORALA, SOUTH COTABATO – Tuman ang kasubo sang pamilya sang isa ka estudyante makaligad ini nga naghikog sa bahin sang Prk Krislam, Brgy. Simsiman, Norala, South Cotabato.
Ginkilala ang biktima nga si Edgardo Llalen, 15 anyos, kag Grade 9 student sang Norala National High School.
Sa interbyu sang Bombo Radyo Koronadal kay PMaj Nathaniel Panaguiton, hepe sang Norala PNP, nagpauli ang biktima kag ginpahayag sa iya pamilya nga indi na ini magaeskwela bangud manubo ang iya grado.
Base sa imbestigasyon, ginpangita nila si Edgardo makaligad ini nga magpabilin sa duyan kag nasapwan na lamang ang nakabitay sini nga bangkay takna alas 5 na sang hapon.
Posible suno pa nga gin-usar sang sulterito ang nylon wire bilang pamaagi sa pag-utas sa iya kaugalingon nga kabuhi sa isa ka bakante nga kwarto sa ila puloy-an.
Sa separar naman nga interbyu sa iya magulang nga si Quirbe Llalen Jr, ginpahayag sa iya ni Edgardo nga magauntat na siya sa pagtuon kag luyag niya nga magpanguma.
Ginbuyagyag man sang biktima sa iya nga magulang nga ginakadlawan siya sang iya mga classmates bangud manubo ang iya mga grado gani ginlaygayan niya ini nga ayuhon ang iya pagtuon agud siya naman ang magakadlaw sa mga nagasunlog sa iya.
