Gindul-ong na sa ulihi sini nga palahuwayan si Lady Jazzy, ang isa ka grade 3 pupil nga nasapwan nga patay sa isa ka maligwin nga lugar sa bahin sang Makilala Cotabato nga nangin biktima sang pagpanglugos antes nga ginpatay.
Gindagsa ang lubong sini sang ginatos ka mga kakilala kag mga kapamilya sang biktima sa diin lunsay nakasuksok sang puti ang mga nagtambong bilang simbolo sang pagka-inosente sini sa kamot sang mga wala kalooy nga suspek.
Nagpalupad man sang mga puti nga balloons ang mga nagtambong sa lubong agud ipakita ang kasubo sa natabo kag pagkadula sang isa ka inosente nga bata.
Nahibaluan nga nangin unod man sang mensahe ni Makilala Mayor Armando Quibod kadungan sang State of Children’s Address sini sa publiko ang makahalanusbo nga natabo sa biktima.
Madumduman nga nagtigana na ang Twenty Thousand pesos nga reward ang alkalde sa sin-o man nga makatudlo sa ginapanaguan sang mga suspek sa makangilidlis nga krimen.
Magluwas diri, ginhingyo man sini ang mga kapulisan nga padasigon ang pagpangita kag pagtumod sa mga suspek sa likod sang kamatayon ni Lazzy.
Una diri, ginpahayag sang Makilala PNP nga may mga stab wound sa nagkalain-lain nga parte sang lawas ang biktima, sa likod sini kag sa tiil kag ang cause of death sini ang nadulaan sang ginhawa.
Dugang pa diri, naguwa man sa medico legal nga ang nagbanog nga pribado nga parte sang lawas sang bata kun sa diin nagapakita lang ini nga ginpwersa ang bata.
Sa karon padayon ang imbestigasyon sang otoridad indi lang sa mga persons of interest pati man sa tanan nga konektado sa bata.
Hustisya naman ang ginasinggitan sang pamilya sang biktima sa makahalanusbo nga natabo sa iya.
