Ginpabutyag ni South Cotabato Governor Reynaldo Tamayo Jr. nga ang edukasyon amo ang isa sa pinakamakusog nga pamaagi agud mapunggan ang diskriminasyon, ilabi na sa mga miyembro sang Indigenous Peoples (IP) sa probinsya.
Suno kay Tamayo, daku na ang pagbag-o sa kahimtangan sang mga IP bangud sang paghatag sang mas daku nga oportunidad sa edukasyon.
Ginpahayag niya nga indi na dapat basehan ang tribu ukon ginhalinan sang isa ka tawo sa paghusga sa iya kapasidad, kay madamo na nga IP ang nakatapos sang kolehiyo kag nakaserbisyo bilang mga propesyonal pareho sang doktor, abogado, engineer kag iban pa.
Ginpahayag sang gobernador nga kapin 42,000 na ka kabataan sa South Cotabato ang nakabenepisyo kag nakatapos sang kolehiyo pinaagi sa mga programa sang probinsya, lakip na ang madamo nga kabahin halin sa mga IP communities.
Bangud sini, nagapati si Tamayo nga kon may mga insidente man sang diskriminasyon, posible ini nga nagasandig sa personal nga panan-aw ukon indi-pag-intindihan sang mga indibidwal kag indi na dapat ibasol sa ila tribu ukon kultura.
Samtang, may kaangtanan sa panawagan nga mabuhinan ukon dula-on ang systems loss sa kuryente, ginpaathag sang gobernador nga may duha ini ka klase: technical kag non-technical systems loss.
Suno sa iya, ang technical loss naghalin sa kondisyon sang power lines kag imprastraktura, samtang ang non-technical loss may kaangtanan sa problema sa pagdumala, lakip na ang illegal connections kag pagpangawat sang kuryente.
Ginpanugyan ni Tamayo nga kinahanglan mapabakod ang pagdumala sang electric cooperatives kag mapauswag ang load balancing agud malikawan ang indi kinahanglanon nga pagkadula sang kuryente nga nagadugang sa ginabayran sang mga konsumidor.
Samtang sa isyu sang pagbaha sa Koronadal City, partikular sa naguba nga bahin sang Channel 3 sang Master Drainage System sa Barangay GPS, ginpahayag sang gobernador nga yara na ini sa responsibilidad sang city government matapos ang turnover sang proyekto.
Apang ginpasiguro niya nga bukas ang provincial government nga maghatag sang bulig ukon augmentation kon kinahanglan na sang siyudad, ilabi na sa pagpatuman sang temporaryo kag malawig nga solusyon sa problema sa baha.
Suno kay Tamayo, posible masolbar ang nagkalain-lain nga problema kon may yara sang koordinasyon, kooperasyon, kag paghiusa sang nagkalain-lain nga lebel sang gobyerno para sa kaayuhan sang mga pumuluyo.
