KORONADAL CITY – Napabilin sang Socsksargen region ang ranking sa bag-o lamang nagtakop nga Palarong Pambansa 2024 sa siyudad sang Cebu.
Ini ang ginpahayag ni Mr. Magdaleno Duhilag, Regional Sports Officer sa interview sang Bombo Radyo Koronadal.
Suno kay Duhilag, ang 17 ka Gold medals nga naangkon sang Region 12 subong nga Palaro ang pareho lang sa nakuha man sang nakaligad nga tuig.
Sa pagkamatuod, yara man sa rank 8 sa gihapon ang Socsksargen kag buot silingon na-mentenar sang rehiyon ang ika-walo nga spot sini sa Palarong Pambansa 2024.
Pila sa mga events nga may gold medal ang region 12 amo ang mga tennis, archery, arnis, athletics, sepak takraw kag gymnastics girls.
Samtang, ang pila sa mga hinampang nga ginalauman kuntani nga makakuha pa sang gold medals amo ang taekwando kag dancesports bangud yara lamang sa silver nga medalya ang nakuha.
Apang sa pihak sini, maayo sa gihapon ang nangin performance sang rehiyon dose.
Bangud sini, makabaton ang mga atleta nga nakakuha sang gold medal sang P20,000 samtang P5,000 naman sa silver kag P3,000 sa bronze.
Dugang pa ni Duhilag, apisar nga may pila ka mga atleta nga nagbalatian sang sipon, ubo kag hilanat bangud sa masami nga pagbuhos sang ulan nagpadayon sa paghampang ang mga ini sa nagkalain-lain nga event.
Nahibaluan nga may yara pa gani sang athlete sa wrestling nga gindala sa hospital agud ipa-check-up apang naumpawan man kag naghampang sa gihapon.
Sa karon, amat-amat na nga nagapauli sa rehiyon ang delegasyon sang Socsksargen matapos ang ginpatigayon nga Palarong Pambansa 2024.
Sa kabug-usan, nagpalab-ot sang pagpasalamat ang opisyal sa tanan nga atleta, mga ginikanan, mga nagsuporta kag sa tanan nga nabulig agud mangin madinalag-on ang Socsksargen Warriors sa nasambit nga national sports event.
Nahibaluan nga ang madason nga Palarong Pambansa ang ipatigayon sa Ilocos Norte.
