KORONADAL CITY- Mainit nga gina istoryahan subong ang ginbuyagyag nga suno pa anomalya sa organisasyon sang Lady Locals Legislators League of the Philippines kun sa diin mismo nga anay presidente sang FOUR-L ang nagbuyagyag sang nagluntad nga maanomalya nga pag usar sang pondo sang ila nga grupo.
Sa ekslusibo nga interbyu sang Bombo Radyo Koronadal kay South Cotabato 2nd District board member Cecile Diel, nga anay presidente sang FOUR-L, nag-ugat ang nasambit nga isyu makaligad matukiban suno pa sini ang kwestyunable nga pag-usar sangn pondo nga naglab-ot sa halos P8 million nga gingasto para lang sa pagkaon sang magpatigayon sang 2 ka adlaw nga General Assembly ang tanan nga myembro sang FOUR-L sa pungsod.
Direkta naman sini nga gin-akusaran ang nagatindo nga treasurer sang FOUR-L nga si South Cotabato 2nd District board member Ellen Grace Subere-Albios nga ginpeke suno pa sini ang resibo sa mga pagkaon nga ginbakal para sa nasambit nga pagtililipon nga halos P8 million.
Samtang sa pihak nga bahin, dipensa naman ni BM Albios nga nahibaluan suno pa sang anay presidente sang organisasyin ang tanan nga transaksyon kag ginpabulaanan sini ang tanan nga mga akusasyon batuk sa iya mangin man ang nagalapta nga dokumento nga ginasiling nga ginpeke sini.
Dugang pa sini nga nakahanda si BM Albios nga atubangon ang anuman nga kaso nga igasang-at batok sa iya.
