KORONADAL CITY- Nakatalana nga magpadulong sa National Telecommunication Commssion ukon NTC si Ginang Tess Katherine Dorias, ang negosyante nga nabiktima sang Budol-Budol Gang sa banwa sang Sto. Niño, South Cotabato.
Sa interbyu sang Bombo Radyo Koronadal kay Gng. Dorias, kinahanglan pa sini paninguhaan nga marekober ang balor P40,000 nga load nga nabudol sa iya sang suspek nga nagpakilala kag nag usar sang pangalan ni Sto.Niño SoCot mayor Pablo “Abog” Matinong.
Nahibaluan nga kinahanglan ma retrieve ang recording sang pag istoryahanay ni Gng. Dorias kag sang suspek agud nga makabulig sa imbestigasyon sang Sto. Niño PNP.
Madumduman nga natabo ang insidente sang nakig-angot sa iya ang suspek nga nag usar sang pangalan ni Mayor Matinong kag nag pakuno-kuno nga magapahimo sang cake para sa birthday suno pa sang bata sini apang sa tunga sang transaksyon nagdemand ang suspek nga paloadan ini kag pagabayaran lang kun magkitaay sila.
Wala man nakahibalo ang biktima kun nga-a nagpati ini sa nangin sugo sang suspek pinaagi sa tawag kag nakapaload ini sang P40,000 nga kantidad sang load apisar wala siya sang kwarta nga gina-uyatan.
Kasubong nga wala suno pa ini sa kaugalingon sa sulod sang halos isa ka oras nga transaksyon nila sang suspek pinaagi sa tawag sa cellphone kun sa diin nagpangita gid ini sang pamaagi nga mapaloadan ang suspek pinaagi sa iya mga kakilala kag pila ka mga loader sa nasambit nga banwa.
Sa karun tuman ang pagmahay ni Gng Dorias makaligad isa sya sa mga nabiktima sang nasambit nga modus.
