Ginpasigro sang Provincial Government sang South Cotabato nga wala sang lockdown nga matabo bisan pa may kumpirmado na nga mga kaso sang MPOX sa probinsya.
Sa interbyu sang Bombo Radyo Koronadal kay South Cotabato Governor Reynaldo S. Tamayo Jr., ginpahayag niya nga kung may lockdown man nga ipatuman, halin giid ini mismo sa iya.
Ginpasiguro man niya nga indi kinahanglan mag-lockdown bangod aktibo ang surveillance kag monitoring sang probinsya batok sa nasambit nga balatian.
Dugang pa ni Tamayo, wala naman nagdugang ang kaso sang MPOX sa probinsya, pero ginpahanumdom gihapon niya ang publiko nga magsunod sa mga basic health protocols kag likawan anay ang skin-to-skin contact.
Madumduman nga may na-record nga 11 ka kaso sang MPOX ang South Cotabato.
Sa subong, naglab-ot na sa anum (6) ka pasyente ang nag-ayo kag naka-recover halin sa MPOX.
Dugang pa, ginpahayag man ni Governor Tamayo nga wala sang implementasyon sang “No facemask, No Entry” policy sa probinsya bangod indi man ini airborne ang balatian.
Nagapanawagan si Governor Reynaldo S. Tamayo sa tanan nga magpabilin nga alerto kag kung may nabatyagan nga sintomas sang MPOX, ipahibalo ini gilayon sa mga health authorities agud mabuligan dayon kag malikawan ang pagkaylap sang virus.
