KORONADAL CITY- Nagapadayon sa karon ang imbestigasyon sang Isulan PNP sa nagluntad nga shooting incident sa National Highway Prk, Don Juan, Brgy. Kenram, Isulan, Sultan Kudarat.
Sa impormasyon sang Isulan PNP, isa ka tawag ang ila nabaton halin sa isa ka concerned citizen angot sa nagluntad nga pusilanay sa nasambit nga lugar kun sa diin gilayon naman nga ginresponderan sang Isulan PNP sa pagpanguna ni Police Captain Rovi L. Jardenil, deputy chief of police sang Isulan Municipal Police Station.
Base sa imbestigasyon, ang mga wala pa natumod nga mga biktima ang sakay suno pa sang ila mga motorsiklo nga may plate number nga 1201-523743, sang gulpi na lamang sila ginpangluthang sang makapila ka bes sang wala pa man matumod nga mga suspek kun sa diin naigo ang mga ini sa nagkalain-lain nga bahin sang ila lawas.
Nahulog naman sa motorsiklo ang isa ka biktima sang pagpangluthang samtang ang upod sini ang nakapalagyo.
Gilayon naman nga gindangat sa Sultan Kudarat Provincial Hospital ang biktima nga nakaangkon sang madamo nga pilas sa iya mga lawas.
Ginkakibot naman sang mga otoridad ang pagkarekober sang Improvised Explosive Device sa posisyon sang biktima samtang narekober naman sa crime scene ang 2 bala sang cal. 45 pistol, 10 empty shell sang cal. 45 pistol kag 17 empty shell sang 9mm pistol mangin ang isa ka motorsiklo.
Sa karon gina obserbaran pa ang kahimtangan sang biktima nga naka confine sa ospital kag igapaidalom man sa imbestigasyon sa tion nga makarekober na makaligad makuhaan sang IED samtang nagapatigayon man sang search operation sa isa pa ka biktima.
Ginahibalo naman sa karon ang mga suspek sa likod sang pagpangluthang sa ila.
