-- ADVERTISEMENT --

KORONADAL CITY – Nagapadayon sa subong ang manhunt operation sang mga otoridad batuk sa isa ka suspek nga nagapangatubang sang patong-patong nga kaso sa banwa sang Polomolok, South Cotabato.

Sa esklusibo nga interbyu sang Bombo Radyo Koronadal kay Police Col Joel Limson, Police Provincial Director sang South Cotabato PNP, ginpahayag ini nga padayon ang paglagas sa subject sang search warrant implementation nga ginkilala kay Jeoffrey Nilong, yara sa legal nga edad kag residente sang Prk 2, Brgy Lapu, Polomolok, South Cotabato.

Suno kay Limson, ang suspek ang nagapangatubang sang kaso nga paglapas sa RA 10951 ukon illegal Possesion of Firearms and Ammunitions kag kaso nga frustrated murder.

Nahibaluan sang suspek nga magaoperar na ang mga otoridad rason nga gilayon ini nagpalagyo nga nag-agi sa isa ka manhole.

Apisar nga nakapalagyo si Nilong, natukiban kag narekober sa puluy-an sini ang mga bala kag IED Components.

Samtang, gin-arestar naman sang PNP ang asawa sini nga si Vanessa Nilong bangud sa mga narekober nga mga gamit sa paghimo sang esksplosibo.

Nahibaluan nga ang nasambit nga suspek ang madugay na nga ginamonitor sang mga otoridad kun diin ginaangot man ini sa Maute-ISIS group kag sa serye sang krimen kag pagpamomba sa bilog probinsya.
Top