Nasabat sang mga otoridad ang duha ka lalaki nga may dala nga ginapatihan nga shabu kag natiruhan matapos nga nang-agaw sang armas sang mga kapulisan sa checkpoint sa Brgy. Namnama, Koronadal City sang Enero 24, 2025.
Ini ang gikumpirmar ni Kap Joel Damo sang Brgy. Namnama sa panayam sang Bombo Radyo Koronadal.
Ginkilala ang mga suspek nga sanday alyas “Yan-yan” nga taga Brgy. Tamnag, Lutayan, Sultan Kudarat kag alyas “Mo-mo” nga taga Brgy. Mamali, Lutayan, Sultan Kudarat.
Sandig naman sa imbestigasyon, nag u-turn ang mga suspek sang nag abot sa checkpoint kag sang gin apprehend sang mga kapulisan, nag palag ini gamit ang gin agaw nga armas ni Plt. Cervera amo rason nga aksidente nga naigo ini.
Nakaagom naman sang pilas si Yanyan kag narekober sa motor sini ang pipila ka mga pakete sang ginapatihan nga shabu kag ginaalegar man nga motornap ang motorisklo nga gamit sini bangud wala sang mga dokumento kag wala sang plate number ini.
Gindala naman sa malapit nga balay bulolngan si Yanyan agud mahatagan sang tama nga medical attention.
Samtang, padayon naman ang imbestigasyon sang otoridad kung pila ang balor sang dala nga ginapatihan nga shabu, ano pa ang dala sini kag kung motornap ba ang gamit nga behikulo sini.
Ginasiguro naman ni Kap Damo ang operasyon, pag bantay sang mga otoridad sa mga checkpoint kag pakig-angot sang iya opisina sa lugar agud malikawan ang pag pagsulod sang mga iligal nga mga butang.
