Ginpahayag ni US President Donald Trump nga nagabulig ang Germany sa pagsuporta sa strikes sang US batok sa Iran matapos nga nagkit-anay sila ni German Chancellor Friedrich Merz sa White House.
Suno kay Trump, ginapahanugutan sang Germany ang paggamit sang US military bases sa ila teritoryo agud suportahan ang mga operasyon may kaangtanan sa strikes. Gin-athag niya nga wala naman direkta nga nagapakigbahin sa inaway ang mga soldado sang Alemania.
Ginpahayag man sang presidente sang Estados Unidos nga dako ang halit sa military forces sang Iran, lakip na ang mga bahin sang air defense kag navy sini.
Si Merz, sa iya bahin, nagpabutyag sang suporta sang iya pungsod sa panindugan sang US kag ginpahayag nga pareho lang ang ila panan-awan sa gobyerno sang Iran. Gintalakay man sa sinapol ang iban pa nga mga isyu sa seguridad kag komersyo.
Ang pagsinapol ginpatigayon sa tunga sang nagadugang nga tensyon sa Middle East bangud sang mga pag-atake sang US kag Israel sa mga target sa Iran, samtang ginabantayan sang internasyonal nga komunidad ang posible nga paglala sang sitwasyon.
