Ginkumpirmar ni Vice President Sara Duterte nga wala nakaboto ang iya amay nga anay Presidente Rodrigo Duterte sa subong nga national kag local elections bangod wala siya nakarehistro para sa Local Absentee Voting (LAV).
Suno kay VP Sara, ginpaninguhaan sang mga abogado ni Duterte nga kumbinsihon ang Commission on Elections (Comelec) nga tugutan siya nga makaboto bisan nalampuwan na ang deadline sang LAV, pero wala ini gin-aprobahan.
Nadumduman nga nadakpan si Duterte sang International Criminal Court (ICC) sang Marso 11 bangod sa mga kaso nga crimes against humanity nga may kaangtanan sa iya kontrobersyal nga war on drugs.
Nagapadalagan si Duterte bilang alkalde sang Davao City samtang yara siya sa prisohan sa The Hague, Netherlands, kag ang iya kalaban amo ang anay niya nga cabinet secretary nga si Karlo Nograles, nga nagapadalagan bilang independent candidate.
Bisan yara sa prisohan, nagapabilin nga popular si FPRRD base sa mga survey. Kon magdaog siya, mahimo siya ideklarar nga nagdaog sang Comelec, gawas na lang kon mapamatud-an siya nga may sala sang ICC.
