Ginkumpirma sang Bureau of Immigration (BI) nga nakabalik na sa Pilipinas ang anay Department of Public Works and Highways (DPWH) Secretary nga si Manuel Bonoan halin sa Taipei, Taiwan.
Sa isa ka pahayag, ginpahayag sang BI nga nag-abot si Bonoan sa Ninoy Aquino International Airport (NAIA) sini nga Domingo, Enero 18, sakay sang isa ka China Airlines nga eroplano halin sa amo nga pungsod.
Ginpahayag man nila nga wala siya sang upod sang nagbalik sa Pilipinas kag gilayon man ginpahibalo sang Immigration Commissioner nga si Joel Anthony Viado sa Department of Justice (DOJ) ang pagbalik ni Bonoan, agud suportahan ang nagapadayon nga mga tikang sa pag-usisa sang mga isyu nga may kaangtanan sa mga anomalya may kahilabtanan sa flood-control projects.
Madumduman nga ginbutang si Bonoan sa BI Lookout Bulletin Order suno sa mando sang DOJ bangod man sa amo nga mga isyu nga nagalibot sa ginapatihan nga mga anomalya.
