KORONADAL CITY – Nagapadayon ang imbestigasyon sang mga otoridad sa nagluntad nga pagpangluthang sa isa ka lalaki sa Plaza sang Barangay Topland, Koronadal City alas-6:45 subong gid lamang nga gab-i.
Sa eksklusibo nga interbyu sang Bombo Radyo Koronadal kay Barangay Kagawad Tikboy Pelino, nagluntad ang insidente samtang madamo sang tawo sa Barangay Plaza bangud may aktibidad angot sa nagahilapit nga kafiestahan sini sa Nobyembre 29 sini nga tuig.
Ginkilala lamang sini kay Alyas Memo ang biktima nga pangayaw lamang ukon indi residente sang nasambit nga barangay.
Sa pahayag naman ni Barangay Kagawad Dondie Bayona, si may 3 ka basiyo sang kalibre 45 nga nakit-an sa lugar nga ginluntaran sang krimen.
Isa lamang suno pa ang suspek nga nagluthang sa biktima apang wala ini makilal-an.
Suno naman sa BPATs nga nagdala sa South Cotabato Provincial Hospital sa biktima, wala na ini sang kabuhi sang nag-abot sa balaybululngan.
Nahibaluan nga may kaso na nga pagpangawat ang biktima antes pa man ini nga nagpa-amolya sa nasambit nga barangay.
Sa subong yara na ang SOCO kag kapulisan sa lugar agud mag-imbestigar.
