KORONADAL CITY – Ginabulubanta nga yara na sa masobra napulo ka tonelada sang tilapia ang apektado sang kamahong ukon fish kill sa Lake Sebu, South Cotabato bangud sa malain nga paniyempo.
Ini ang ginkumpirmar ni Lake Warden Rudy Muyco sa interview sang Bombo Radyo Koronadal.
Suno kay Muyco, tatlo ka adlaw na nga nagpatuman sang emergency harvest ang mga fish cages operators sa Barangay Bacdulong kag Barangay Poblacion matapos nga naigo sang kamahong bangud sa asod-asod nga pagbuhos sang ulan.
Ginpatigayon ang emergency harvest agud nga mahimo pa nga mabaligya ang isda kag makaon ukon makunsomo sang publiko subong man maka-income pa bisan paano ang mga fish cage operators.
Ginpaathag pa ni Muyco nga ang malain nga paniempo ang isa ka rason sang kamahong amo nga nagakasuffocate ang mga tilapia sa tubig bangud man sa kawad-an sang oxygen.
Sa karon, padayon gihapon ang monitoring kag pagtipon sang datos sa naapektuhan sang kamahong.
Aminado man si Muyco nga bangud nga overpopulated na ang fish cages sa Lake rason nga indi na malikawan ang makapila ka beses nga pag-igo sang Kamahong kada tuig.
Sa karon, ginahulat pa kun maimplementar na sang LGU Lake Sebu ang kamanduan sa pagpatuman na sang moratorium sa Lake kun diin pagalimitahan ang igabutang nga fish cages.
Nahibaluan nga sa kasamtangan yara na sa 5,500 ang fish cages sa bug-os nga Lake nga sobra na sa 3000 lamang kuntani nga kapasidad sini.
Gindula man ni Muyco ang kabalaka sang publiko sa pagkonsumo sang tilapia bangud ang mga naharvest sang mas temprano ang safe pa nga kaunon.
