Madinalag-on nga nakuha sang Filipina tennis ace nga si Alex Eala ang gold medal sa Tennis women’s singles sa 2025 Southeast Asian Games sa Thailand.
Ini matapos nga ginlutos ni Eala ang Thai tennis player nga si Mananchaya Sawangkaew sa gold medal match sa straight sets nga 6-1, 6-2. Wala gid nakakuha sang bisan isa ka set ang pambato sang Thailand.
Samtang, bangud sa amo nga dominante nga performance nakuha ni Eala ang iya pinakauna nga gold medal sa SEA Games. Na untat man ang 26 ka tuig nga hulat sang Pilipinas, bangod sang 1999 pa sa Brunei sang ulihi nga beses nga nakakuha sang gold medal ang Pilipinas sa Tennis women’s singles pinaagi kay Maricris Fernandez-Gentz.
Madumdoman man nga antes sang SEA Games 2025, napagkit na ang ngalan ni Eala sa tennis matapos malab-ot sa iya karera ang ika-50 nga ranggo sa bug-os nga kalibutan suno sa World Tennis Association.
