KORONADAL CITY – Wala pa sang extension nga ginhatag ang Comission on Elections (COMELEC) para sa filing sang Statement of Contribution and Expenditures ukon SOCE sang mga kandidato nagdaug man ukon wala sang naglabay nga eleksiyon.
Ini ang ginpaklaro ni Atty. Renato Magbutay, Director sang Comelec Region 12 sa interview sang Bombo Radyo Koronadal.
Suno kay Magbutay, nakasaad sa laye nga 30 days after election dapat nga magsumiter sang SOCE ang mga kandidato.
Sa tion nga indi maka-file ang mga ini magapangatubang sila sang penalidad kasubong sang administrative case, perpetual disqualification kag mabug-at nga kaso nga igasang-at batuk sa mga kandidato.
Gin-insister pa ni Director Magbutay ang “No SOCE, No Oath taking policy sang DILG” nga dapat suno pa tandaan sang mga kandidato.
Dugang pa sang opisyal, indi dapat nga balewalaon sang mga ini ang ila obligasyon bangud sa ulihi sila ang may salabton sa laye.
Nahibaluan nga alas-5 subong nga hapon lamang ang deadline nga ginhatag sang komisyon sa pagsumiter sang SOCE.
