KORONADAL CITY – Ginabantayan mangin sang mga Pinoy OFWs sa Russia ang prestihiyoso nga 2018 FIFA World Cup nga ginapatigayon sa nasambit nga pungsod.
Sa interbyu sang Bombo Radyo Koronadal kay Bombo international correspondent Buen Victor Sumaylo, nga isa ka seaman kag taga-Sta. Barbara, Iloilo, apesar masako sila sa ila trabaho sa barko kaupod ang mga Pinoy kag Amerikano nga tripulante, ginpahanugotan sila sang ila kapitan nga makakadto sa Kaliningrad stadium.
Tuman ang iya kalipay sang ma-eksperyensiyahan nga live ang hampang sa tunga sang Croatia kag Nigeria kun sa diin nagdaog ang una nga nangin No. 1 sa Group D sang World Cup.
Makabig suno pa niya ini nga “once in a lifetime experience” bangud isa man ini ka football player sa iya ginhalinan.
Mas na-excite pa ini sang makita ang Croatian team midfielder nga si Luka Modric.
Nagpasalamat naman ini sa tion nga kaisa siya sa 31,800 nga audience sang FIFA World Cup.
Sa subong plano ni Sumaylo nga magtambong kag bisitahon ang iban nga games sa nasambit nga pahampang.
