KORONADAL CITY- Madinalag-on ang ginpatigayon nga entrapment operation sang mga otoridad sa pagpanguna sang Isulan PNP sa probinsya sang Sultan Kudarat makaligad ginreport ang extortion incident sa kumbuyuhan sang Husky bus sa nasambit nga banwa.
Sa eklusibo nga interbyu sang Bombo Radyo Koronadal kay Police Superintendent Joefel Siason, hepe sang Isulan PNP, ginkilala ang suspek kay Jerry Ibrahim yara sa legal nga edad kag ginapatihan nga myembro sang isa ka lawless group halin sa Datu Saudi Ampatuan, Maguindanao nga nagapatigayon sang extortion sa nasambit nga lugar.
Dugang pa nga naglab-ot sa P1 million ang demand sini kag sang iya nga grupo sa nasambit nga kumbuyuhan kag nagpaandam pa nga pagasunugon ang bus sa oras nga indi magahatag sang nasambit nga balor kun sa diin nagbilin pa ini sang extortion letter kag numero nga pagakontakon sa oras nga magahatag na sang kwarta.
Gilayon naman nga nagpatigayon sang entrapment operation ang mga otoridad kun sa diin nadakpan ang suspek sa National Highway sang nasambit nga banwa kag madinalag-on nga natikma ang suspek.
Sa subong yara na sa kustodiya sang kapulisan ang suspek kag natalana na nga pasakaan sang kaso.
