KORONADAL CITY – Hugot nga ginkondenar sang mga otoridad ang natabo nga panibag-o nga pagpalupok sa isa ka kalan-an sa banwa sang Midsayap, North Cotabato.
Ini ang ginpahayag ni North Cotabato Police Provincial Director Senior Superintendent Emmanuel Peralta sa interbyu sang Bombo Radyo Koronadal.
Sunao kay Peralta, naguwa sa imbestigasyon sang Midsayap PNP nga extortion ang motibo sa nasambit nga pagsigabong kun diin target ang restaurant nga yara sa Quezon Avenue, Barangay Poblacion 5, sa banwa sang Midsayap, Cotabato.
Ginpahayag sang opisyal nga bag-o pa man ang paglupok nakabaton na sang extortion letter ang nagapanag-iya sang kalan-an.
Sa subong, padayon pa nga ginahibalo ang identity sang suspek nga nagbilin sang eksplosibo.
Nagapaayo naman sa subong ang isa ka pilason sa pagsigabong nga si Hisnon Midpantao, 16, sultiro, traysikad driver kag residente sang Sitio Tubak, Barangay Pagangan, Aleosan, Cotabato.
