KORONADAL CITY – Yara na sa kustodiya sang mga otoridad ang anay Vice Mayor sang Lambayong, Sultan Kudarat matapos nga makuhaan sang mga armas luthang sa ginpatigayon nga operasyon sa iya nga puluy-an sa siyudad sang Tacurong.
Ginkilala ni Pol. Supt. Joefel Siason, hepe sang Tacurong City PNP ang naaresto nga si Ex-Vice Mayor Mauya Tungkay, 67 anyos nga residente sang Purok Pagkakaisa, Barangay San Pablo, Tacurong City.
Suno kay Siason, duha ka search warrant angot sa RA 9165 kag RA 10591 ukon violation of illegal possession of firearms ang ginserbe sang gintingob nga pwersa sang Regional Mobile Force Batallion, Sultan Kudarat Police Mobile Force Company kag Tacurong City PNP sa puluy-an sini.
Narekober sa posisyon ni Tungkay ang duha ka loose firearms samtang nag-negatibo naman sa illegal nga droga.
Sa subong, ginapreparar na ang kaso nga ipasaka batuk sa anay bise alkalde.
