Ginkumpirmar ni House Deputy Speaker kag Iloilo First District Congressman Janette Garin nga luyag na ni anay Speaker Martin Romualdez nga ipa-untat ang House Committee on Infrastructure (InfraComm) antes pa man ang pagpungko ni Speaker Bojie Dy, magluwas lang kun may kaangtanan ini sa mga ginaduso nga hagna.
Suno kay Garin, nagkonsulta si Romualdez sa mga komitiba matapos ginmandu sang iya pakaisa nga si Pres. Bongbong Marcos ang pagtukod sang Independent Commission for Infrastructure (ICI) nga amo ang maga-imbestigar sa gina-alegar anomaliya sa flood control projects.
Gin-ako niya nga pila na ka semana nga nagpabatyag ang anay Speaker nga nasakitan ini sa mga pagpakamalaot nga ginabaton sang Kamara, ilabi na nga may pila ka mga kongresista nga gina-angut diri.
Sa kapalaran naman sang InfraComm, mahimo nga magpatigayon sang isa pa ka hearing agud nga ma-endorso sa ICI ang mga materyal nga natipon.
Pahayag niya, ginmandu sa ila ni Dy nga mag-coordinate, mag-facilitate, mag-cooperate subong man mag-contribute sang tanan nga impormasyon nga kinahanglan sang independnt body.
Ang InfraComm ang ginabug-usan sang mga komitiba sang accounts, public works and highways, kag good government and public accountability, ang ginporma sini nga tuig agud imbestigaran ang gina-alegar kurapsiyon sa government infrastructure projects, partikular na sa flood control projects.
