Imbes nga ikumpara kay Ninoy Aquino, mas angay ikumpara si anay Presidente Rodrigo Duterte kay Adolf Hitler.
Ini ang pahayag ni Palace Press Officer Undersecretary Atty. Claire Castro matapos ipahayag ni Vice President Sara Duterte sa isa ka pagtililipon sa The Netherlands nga posible matabo sa iya amay ang nangin assasination kay Ninoy Aquino.
Suno kay Castro, mismo ang anay pangulo ang nagkumpara sa iya kaugalingon kay Hitler sang kasagsagan sang iya kampanya kontra sa ilegal nga droga.
Madumduman ang nangin pahayag man ni Duterte nga kon may tatlo ka milyon nga gin-massacre si Hitler, may ara man tatlo ka milyon nga drug addicts sa Pilipinas kag malipay siya nga patyon ang mga ini.
Dako man ang kalainan sa pagkumpara kay Duterte kay Benigno Aquino bangod wala sang record si Aquino sang mass murder ukon mga krimen batok sa katawhan, kasubong sang mga nagkalat nga extra judicial killings sa panahon sang administrasyon ni Duterte.
Una na nga ginpahayag ni Vice President Duterte sa pagtililipon sang ila mga supporters sa The Hague, Netherlands nga luyag sang iya amay nga magpauli sa Pilipinas, apang nagakahadlok ini nga basi magtupong sa kahimtangan ni Ninoy nga gin-assassinate sang nag-abot sa airport.
