Nagpanghangkat si anay Overseas Workers Welfare Administration (OWWA) administrator Arnell Ignacio sa pagsaka sang kaso batok sa iya bangod sa pagbakal sang ahensya sang lupa nga nagabalor sang P1.4 bilyon.
Ginpahayag niya nga sang tuig 2018 pa, samtang deputy administrator pa lang siya, nagsugod na ang plano sa pagbakal sang amo nga lupa.
Upod niya ang pila ka mga opisyal sang OWWA sa ginpatigayon nga pagdungog sa Senado parte sa nasambit nga isyu.
Ginpanindugan niya nga wala sang bisan ano nga iregularidad sa kontrata bangod ginpasugtan pa ini sang Department of Budget and Management (DBM), samtang ang lupa nga baklon malapit sa Ninoy Aquino International Airport (NAIA) Terminal 1, ginhatagan sang valuation sang LandBank. Nakakuha man sila sang permit halin sa Civil Aviation Authority of the Philippines (CAAP).
Ang amo nga lupa ginaplano patukodan sang lugar para sa temporaryo nga pagpahuway sang mga nagapauli nga overseas Filipino workers (OFWs).
