KORONADAL CITY – Magapangatubang sang kaso nga paglapas sa Section 3-e sang RA 3019 ukon Anti-Graft and Corrupt Practices Act sanday anay Tulunan Mayor Lani Candolada kag iban pa nga opisyal sang LGU.
Ini ang base sa ginpaguwa nga desisyon sang Ombudsman Mindanao angot sa reklamo nga ginsang-at kay Mayor Candolada ni anay Tulunan Municipal Councilor Joel Villamor.
Nag-ugat ang kaso sa pagbayad suno pa sang LGU Tulunan ang masobra 3 million pesos nga Mobilization Fund sa maanomalya nga Farm to market road project.
Nahibaluan nga nagpaguwa sang suspension order ang ombudsman sang January 12, 2015 nga indi na pag idayon ang proyekto apang sa pihak sini nagbayad sa gihapon ang LGU sa Jargon Construction sang 3.7 million pesos nga mobilization fund sang February kag April 2015.
Maathag suno pa nga paglapas ini sa Anti-Graft and Corrupt Practices Act.
Magluwas kay Candolada kaupod man sa ginapakasuhan sang Ombudsman sang kaso nga administratibo nga Gross Neglect of Duty sanday Municipal Accountant Sheryl Mendoza, Municipal Treasurer nga si Eseraldo Aguilar, Municipal Engineer nga si Emmanuel Puerto at MPDO Head Engineer Erna Lee Romualdo.
Kaupod man sa ginapakasuhan ang may yara sang Jargon Construction nga si Engr. Joselito Mercado.
