Gindeklarar nga patay ang anay Undersecretary sang Department of Public Works and Highways (DPWH) nga si Catalina Cabral matapos siya makit-an sa madalom nga bahin sang Kennon Road sa Tuba, Benguet.
Ginkumpirmar ini sang kapulisan sa Benguet matapos ang insidente kahapon sang Disyembre 18.
Sunô sa inisyal nga imbestigasyon sang mga otoridad, padulong si Cabral sa La Union, apang pag-abot nila sa Maramal, Camp 5 kag Camp 4, nagpabilin ini alas-tres sang hapon.
Sang ginbalikan siya sang iya driver sang alas-singko sang hapon, wala na siya makit-an. Gani pag-abot sang alas-siyete sang gab-i, nagpangayo na sang bulig ang driver sa kapulisan, kag didto na nadiskubrihan nga wala na sang kabuhi si Cabral sa may 30 metros nga kadalom sang bangin.
Madumduman nga si Cabral isa sa mga ginrekomendar sang Independent Commission for Infrastructure (ICI) nga kasuhan bangud sang iya pagka imbolbado sa mga anomalya may kaangtanan sa mga flood control project.
Tungod sini, ginmanduan sang Office of the Ombudsman ang Benguet Police nga ipreserbar ang iya mga gamit, kaangay sang cellphone ni Cabral.
Sa subong, padayon pa ang ginahimo nga imbestigasyon sang mga otoridad nahanungod sa natabo nga insidente.
Tatlo naman ang ginalantaw nga anggulo sang kapulisan lakip na diri kun may foul play sa natabo.
