Gindeklarar na nga patay ang anay Undersecretary sang Department of Public Works and Highways (DPWH) nga si Catalina Cabral matapos siya makit-an sa madalom nga bahin sang Kennon Road sa Tuba, Benguet.
Ginkumpirma ini sang kapulisan sa Benguet matapos ang insidente kahapon sang Disyembre 18.
Sunô sa inisyal nga imbestigasyon sang mga otoridad, padulong si Cabral sa La Union, apang pag-abot nila sa Maramal, Camp 5 kag Camp 4, nagpabilin siya sang alas-tres sang hapon. Sang gin balikan siya sang iya driver sang alas-singko sang hapon, apang wala na siya makita. Gani pag-abot sang alas-siyete sang gab-i, nagpangayo sang bulig ang driver sa kapulisan, kag didto na nadiskubre nga wala na sang kabuhi si Cabral sa may 30 metros nga kadalom sang bangin.
Si Cabral isa sa mga ginrekomendar sang Independent Commission for Infrastructure (ICI) nga kasuhan bangud sang iya pagka imbolbado sa mga anomalya may kaangtanan sa mga flood control project.
Tungod sini, ginmanduan sang Office of the Ombudsman ang Benguet Police nga ipreserbar ang iya mga gamit, kaangay sang cellphone ni Cabral.
Sa subong, padayon pa ang ginahimo nga imbestigasyon sang mga otoridad nahanungod sa natabo nga insidente.
