KORONADAL CITY – Ginakabig former South Cotabato governor kag anay DILG Sec. Ismael ‘Mike’ Sueno nga “terrifying times” ang nagluntad sa tion sang isa sa mga historic moments sang Pilipinas nga 1986 EDSA People Power Revolution.
Ginpahayag sa ekslusibo nga interbyu sang Bombo Radyo Koronadal ni Sueno nga isa siya sa mga numero uno nga kritiko sadto ni Pangulong Ferdinand Marcos kun sa diin kasumpong sang iya partido nga United Nationalist Democratic Organization (UNIDO) ang Kilusang Bagong Lipunan (KBL) ni Pangulong Marcos.
Ginpakigbahin sini nga nakaeksperyensiyar ini sang pagpakamalaut kag pagpamahog bangud sa ginapatuman nga martial law sadto.
Pamatuod sini, gindis-armahan ang iya duha ka bodyguard makaligad ginbalabagan sang mga suldado samtang yara sila sa kampanya sa Alabel, Sarangani Province.
Gin-akusasyan man suno pa sila nga mga katapo sang NPA labi na si anay Diocese of Marbel Bishop Dinualdo Gutierrez.
Apang indi man sini malikawan nga dayawon si Marcos bangud sa maayo nga proyekto sini sa agrikultura, edukasyon, imprastraktura, kag iban pa.
Bilib man suno pa ini sa anay pangulo bilang isa ka maalam kag “brilliant” nga presidente.
Nagapanawagan man si Sueno nga kuntani ipakigbahin ang kamatooran sa mga natabo sadtong EDSA kag indi paghimoon nga yawa si Pangulong Marcos bangud lamang sa isyu sang EDSA Revolution.
