KORONADAL CITY– Gin-ako mismo sang ginatudlo prime suspek sa pagrape-patay sa isa ka 9 anyos nga bata nga babaye sa banwa sang Tboli, South Cotabato ang ginhimo sini.
Ini ang ginkumpirmar ni Police Chief Inspector Ramil Villagracia, hepe sang Tboli PNP sa interbyu sang Bombo Radyo Koronadal.
Suno kay Villagracia, matapos maarestar ang suspek nga si Sonny Natividad Kagalingan, 48 years old nga taga Taguig City kag dayu lamang sa nasambit nga banwa, gin-ako sini ang iya ginhimo sa grade 3 pupil.
Ginsaysay pa sang suspek kay Villagracia ang iya nga ginhimo kun diin pagkatapos sini, ginhampas sang tubo sa ulo ang biktima kag ginbuno ang mga maselan nga parte sang lawas sini.
Mabug-at man ang ebidensya batuk sa suspek matapos nga may nagtindog nga testigo nga nakakita mismo sang hitabo.
Samtang, ginhilway naman ang una nga lima ka mga menor de edad nga naaresto makaligad mahibaluan nga wala sang kahilabtanan ang mga ini.
Kadungan sini,a ginpanginwala man sang opisyal nga na-gang rape ang biktima.
Nahibaluan nga anay nga napreso na ang suspek bangud sa illegal nga droga.
