KORONADAL CITY – Balik sa presuhan ang isa ka ex-convict makaligad nga maarestar sang mga otoridad makaligad ang halos 4 ka oras nga hostage drama sa banwa sang Tupi South Cotabato.
Ginkilala ang suspek nga si Johnfrix Escalada, anay na nga napreso bangud sa pagpangawat nga residente sang Purok 13, Barangay Polunoling, Tupi, South Cotabato.
Sa interbyu sang Bombo Radyo Koronadal kay Barangay Kagawad Asser Consing, alas 6:40 kaina sang aga nagsugod ang hostage drama kun diin naghuramintado si Escalada kag ginlabo ang 10-anyos nga bata nga babaye sini nga si Maria Fritzie samtang ginatayaan naman kag ginhadlok ang 6-anyos nga si Cydrix nga
nga bata nga lalaki sini.
Suno kay Barangay Kagawad Consing, una nga gindala sa South Cotabato Provincial Hospital ang babaye nga bata sang suspek nga duguan kag may pilas sa nagkalain-lain nga bahin sang lawas sini.
Apang, nagdugay pa ang hostage drama bangud sa padayon nga pagtaya sang suspek sang patalom sa bata nga lalaki sini tubtob alas-10:10 kaina sang aga nga na-neutralize na ini sang kapulisan.
Ginpangunahan mismo nanday Tupi Mayor Reynaldo Tamayo kag PSSUPT Franklin Alvero, provincial director sang South Cotabato ang pakignegosasyon sa suspek tubtob nga nadis-armahan ini sang nakapalibot nga mga pulis.
Apang, natukiban nga ginlabo man sini ang iya bata nga lalaki nga halos magbulag na nawala nga kamot sini sa iya nga lawas.
Tuman nga pagpangimon naman sa iya asawa ang ginpahayag rason sang suspek kun ngaa ginhimo ang pagpanghostage sa mga bata sini.
