KORONADAL CITY – Nangin madinalag-on ang ginpatigayon nga operasyon sang gintingob nga pwersa sang Philippine Drug Enforcement Agency of Autonomous Region in Muslim Mindanao (PDEA-ARMM), Talitay Municipal Police Station kag 90th IB, Philippine Army batuk sa ginakabig nga notoryos nga drug pusher sa Barangay Kiladap, Talitay, Maguindanao.
Ginkilala ang napatay nga suspek nga si Maguid Sinduan, anay barangay Kagawad kag involbado sa pagduso sang droga sa probinsiya sang Maguindanao kag kaiping nga probinsiya.
Suno kay Major General Arnel Dela Vega sang 6th Infantry Division, Philippine Army si Sinduan ang una nga nagpalupok sa operating team rason nga napilitan ang mga ini nga luthangon ang suspek.
Gindala pa sa hospital ang suspek apang ginbawian man sang kabuhi.
Nakuha sa posisyon sini ang caliber 45 pistol, 9mm pistol, assorted ammunition, magazine kag 200 gramo sang ginapatihan nga shabu kag mga drug paraphernalia.
