Nag-file sang ethics complaint sa Senado batok kay Senator Ronald ‘Bato’ dela Rosa ang civil society group nga ‘Wag Kang KuCorrupt’ sa pagpanguna ni anay Finance Undersecretary Prof. Cielo Magno.
Ini bangud sa padayon nga pag-absent sang senador sa iya official duties sa Senado sa sulod na sang masobra tatlo ka bulan.
Nasaad sa reklamo nga ang padayon nga indi pagsulod ni Dela Rosa sa Senado, indi lang kapabayaan sa iya obligasyon kundi isa ka grave abuse sa pribilehiyo kag pagsalig nga ginhatag sa iya sang mga Pilipino nga nagboto sa iya bilang senador.
Ginpunto pa sa complaint nga kon ang ordinaryo nga trabahante kag empleyado gani ang padayon nga absent sa trabaho, otomatiko nga wala sang sweldo kag kon kaisa, magapangatubang pa sa disciplinary action, salary deduction, suspensyon kag termination.
Nagalaum si Prof. Magno nga maaksyunan gilayon sang Senate Committee on Ethics ang reklamo nga gin-file batok kay Dela Rosa kag hatagan sang penalidad ang senador.
