KORONADAL CITY – Tuman ang pagpangasubo nga nabatyagan subong sang pamilya sang isa ka 16 anyos nga sultero makaligad ini nga naghikog bangud suno pa sa modular learning.
Sa eksklusibo nga interbyu sang Bombo Radyo Koronadal kay alyas Emily, iloy sang biktima nga si alyas Danny, residente sang Brgy. Cebuano, Tupi, South Cotabato, ginpahayag sini nga nabudlayan suno pa siya sa module sa subject nga Mathematics sa una nga adlaw sang klase sadtong Oktobre 5 gani ginhangyo niya sa iya iloy nga ibalik na lamang ang module kag magauntat na siya sa pagtuon.
Dugang pa ni alyas Emily, ginkakibot na lamang nila sang nasapwan na lamang nila ini nga nagabitay na sa ila anay nga puloy-an mga 200 metros ang kalayoon halin sa ila kasamtangan nga puloy-an, kag wala na sang kabuhi.
Ginasiling nga ginabatyag sang sultero ang kapigaduhon sa kabuhi kag ang pag-adjust sa bag-o nga mode of learning bangud sa covid-19 crisis.
Nahibaloan nga ikaduha siya sa lima nga mag-ulutod.
