Patay ang isa ka estudyante nga babae matapos nga salpukon kag guyuron ang motor nga ginasakyan sini sang isa ka trailer truck sa Sitio Centro Inn, Barangay Tasiman, Lake Sebu, South Cotabato.
Ini ang ginkumpirme ni LtCol. Bernie Faldas, ang hepe sang Lake Sebu PNP sa panayam sang Bombo Radyo Koronadal.
Ginkilala ni Faldas ang biktima nga si Arjerine Enricoso, babae, 19-anyos, estudyante, kag residente sang Brgy. Tasiman, Lake Sebu, South Cotabato samtang ang driver naman sang trailer truck ang ginkilala nga si Jesson Frigillana, 36-anyos nga taga-Lambayong, Sultan Kudarat.
Suno kay Police LtCol.Faldas, padulong kuntani sa Brgy. Poblacion ang estudyante nga si Arjerine sakay sang iya motorsiklo sang nasugata sini ang trailer truck nga yara sa opposite direction.
Naglapaw suno pa ang motorsiklo sa linya samtang paliko ini nga nangin tunaan sang pagkabangga kag naguyod ini sang trailer truck. Nakit-an suno pa sang driver sang trailer truck nga nabangga sini ang estudyante apang sa kabu-gat sang iya man nga ginmaneho, nawad-an ini sang kontrol.
Naguyod sang halos 25 metro ang biktima kaupod ang motorsiklo sini bag-o man nahulog sa bangin ang backhoe nga karga sang truck.
Nakapagkit sang seryoso nga pilas sa ulo kag nagkalain-lain nga bahin sang iya lawas ang biktima rason sang kamatayon sini.
Sa dugang, madason man nga nagsungka sa mga otoridad ang drayber ng si Frigillana kag nakatalana nga pagasakaan sang mga kaso.
Nagpanawagan man si Police LtCol. Bernie Faldas sa tanan nga mga motorista na maghalong sa byahe kag pagahimuon ang defensive driving agud malikawan ang anuman nga insidente sa dalanon.
