KORONADAL CITY – Negatibo na sa karon sang African Swine Fever (ASF) ang mga baboy sa siyudad sang Koronadal base sa pinakaulihi nga resulta sang monitoring.
Ini ang nangin pahayag ni City Veterinarian Dr. Charlemagne S. Calo, sa interbyu sang Bombo Radyo Koronadal. Suno sa iya, bangud sa sunod-sunod nga blood sampling nga ginhiwat naguwa nga tubtub sa karon, wala pa sang napagkit nga kaso sang ASF sa siyudad.
Ginpahayag sang opisyal nga una pa lamang nagpatuman na sila sang sentineling program ang City Veterinary Office sang naglabay nga tuig, pianaagi sa 52 ka mga baboy kaupod ang Department of Agriculture (DA) Region XII, nga nagpanagtag sang dugang nga 27 ka baboy bilang kabahin sang proseso sa paglikaw sang balatian nga ASF.
Samtang, nagapadayon sa gihapon ang pagbantay sa mga Quarantine Checkpoint batok ASF. Apisar nga wala na sang kaso sang ASF, tuman man ka hugot sa gihapon ang ila nga pagbantay kag pagtutok sa mga buhi o kun gin-ihaw nga mga baboy nga nagasulod sa Koronadal.
