KORONADAL CITY – Malipayon nga ginbalita sang Department of Education Region 12 nga preparado na ang lima ka mga eskwelahan sa rehiyon nga kalakip sa pilot schools sang limited face to face classes sa palaabuton nga Nobyembre 15, subong nga tuig.
Suno kay DepED 12 Regional Director Carlito Rocafort kalakip sa lima ka mga eskwelahan ang Bato Elementary School sa North Cotabato nga naguba sa pagpanalasa sang mabaskog nga linog sang tuig 2019 kun diin sentro ang nasambit nga probinsiya.
Sa pagbuligay sang mga ginikanan, LGU kag iban pa nga mga stake holders sa lugar, natukod ang mga Temporary Learning Shelter para sa mga estudyante kag nakapasar sa nakalatag nga guidelines sa Joint Memorandum Circular sang DOH kag DepED.
Ang apat pa ka mga eskwelahan nga yara naman sa 100% preparado na ang ginalakipan sang Paco National High School sa Kidapawan City, Aspang Elementary School sa General Santos City, Nelmida Elementary School sa siyudad sang Koronadal nga isa ka IP School kag Ned National High School sa Lake Sebu, South Cotabato.
Nahibaluan nga nagalab-ot sa masobra 600 ang mga estudyante nga kalakip sa limited face to face classes sa Socsksargen.
