Ginkumpirmar ni Senate President Chiz Escudero nga napilian sang mga Senador ang Senate blue ribbon committee nga amo ang magapatigayon sang imbestigasyon natuhoy sa maduguon nga ‘war on drugs’ sang Duterte administration.
Suno kay Escudero, nagkumporme man diri sanday Senators Ronald “Bato” dela Rosa kag Bong Go.
Madumduman nga sanday Dela Rosa kag Go ang naghingyo sa Senado nga magkasa sang imbestigasyon kaangay sang ginahimo sang House Quad Committee (QuadComm).
Pagapamunuan naman ni Senate Minority Leader Koko Pimentel ang subcommittee sang Committee on Accountability of Public Officers and Investigations ukon blue ribbon bangud nga masako pa si Senator Pia Cayetano.
Napilian ang blue ribbon committee nga magpatigayon sang imbestigasyon bangud nga mahimo ini nga maghimo sang motu proprio investigation samtang nga naka-recess ang Kongreso.
Luyag ni Escudero nga patigayunon ang hearings samtang nga naka-recess ang Kongreso bangud nga mangin masako na ang Senado sa mga deliberasyon sa national budget kon magbukas na ang regular session sa November 4.
Sini nga semana, ginpahayag ni Go ang ideya nga magpatigayon sang parallel Senate investigation sa drug war sang administrasyon ni former President Rodrigo Duterte bangud sa iya gintawag nga “baseless accusations” batuk sa former president, kay Dela Rosa kag sa iya, sa nagapadayon nga House QuadComm investigation.
Samtang ginpahayag naman ni Dela Rosa nga magalunsyar sia sang motu proprio investigation natuhoy sa drug war kag imbitaron niya si Duterte bilang isa sa mga resource persons.
Lunsay kaalyado ni Duterte ang duha ka mga senador sa diin nagserbe man si Dela Rosa bilang Philippine National Police chief sang iya nga administrasyon samtang si Go naman ang nangin assistant sang anay presidente.
