Patuloy ang malawakang paghahanap ng mga otoridad sa Colombia para sa isang maliit na commercial jet na may sakay na 15 katao matapos itong mawala sa radar malapit sa hangganan ng Venezuela.
Ang Satena Flight NSE 8849, isang Beechcraft 1900 na nakarehistro bilang HK-4709 at inooperate ng kumpanyang SEARCA para sa state-owned airline na Satena, ay umalis mula Cúcuta papuntang Ocaña noong Enero 28.
Nawalan ng komunikasyon ang eroplano sa air traffic control bandang 11:54 ng umaga, ilang minuto bago ito inaasahang lalapag ng 12:05 ng tanghali sa Ocaña.
Ang lugar kung saan huling nakita ang eroplano ay sa Catatumbo region, isang bulubunduking, liblib na bahagi malapit sa border ng Colombia at Venezuela, kaya naging hamon sa mga rescue teams ang paghahanap.
Ayon sa mga opisyal, may 13 na pasahero at 2 crew members ang sakay ng flight nang ito ay nawala mula sa radar.
Hanggang sa huling ulat, aktibo pa ang mga search and rescue operations gamit ang mga sasakyang pang-himpapawid at ground units upang mahanap ang nawawalang eroplano at mga sakay nito.
