Nasaksihan sang bilog nga kalibutan ang party- inspired nga opening ceremony sang Paris Olympics 2024.
Madamo nga techno kag Europop music nga gin-updan sang maduagon nga dancers suksok ang ila mga outfits ang nag-agaw atensyon sang kalibutan sang ginpasundayag sang mga French ang ila party scene.
Sa una nga bahin sang seremonya, nag-perform ang heavy metal band Gojira kag nabatian ang classic rock anthems kag dance tracks, nga may paglinagumba sang drums kag pagkuskos sang gitara nga ginakabig nga maragtason bangud ini ang una nga tion nga isa ka metal band ang nagtukar sa isa ka Opening Ceremony sang Olympiada.
Sa pagtakop naman sang seremonya, ginpalakpakan ang “Queen of Power Ballads” nga si Celine Dion nga nag-perform sa pinakauna nga kahigayunan makaligad ang apat ka tuig nga pahuway bangud sa stiff person syndrome.
Ang iya performance sang “L’Hymne à l’amour” ang nagsirado sa seremonya.
Isa ka matunog nga palakpak kag pagsinggit ang naglanog sa bilog nga Paris agud ipakita ang pagdayaw sa singing icon.
Samtang,sa report naman sang amon Bombo International Correspondent sa France, iya ginpahayag nga napasundayag sa seremonya kun ano ang France kag kun ano nga sahi sang tawo ang mga French paagi sa ginpakita nila nga simbolo sang liberty kag solidarity bilang nasyon.
May yara sang ginpangset-up nga dalagko nga mga screens sa palibot sang Paris agud malantawan sang mga tawo nga indi makasulod sa mga playing venues.
