Padayon ang pagmonitor kag paghatag sang guidelines sang Embahada sang Pilipinas, ilabi na ang Department of Migrant Workers (DMW) kag Overseas Workers Welfare Administration (OWWA), sa mga Pilipino sa Jordan.
Ini ang nangin pahayag ni Renalou Cabuyadao, Bombo International Correspondent to Jordan, sa interview sa Bombo Radyo Koronadal.
Suno kay Cabuyadao, padayon ang monitoring sang Embahada sang Pilipinas, lakip na ang pagbulig sa mga Pilipino nga na-stranded sa Jordan.
Ginpahayag man niya nga bisan may kinagamo, nagapadayon gihapon ang trabaho kag bukas ang mga tindahan, luwas sa mga buluthuan agud masiguro ang kaluwasan sang mga kabataan.
Nagpasalamat man si Cabuyadao sa gobyerno sang Pilipinas sa ila padayon nga pagmonitor kag paghatag sang bulig sa mga Pilipino sa Jordan sa tunga sa nagapadayon nga tensyon sa Middle East.
Sa pihak nga bahin, nagpanawagan si Cabuyadao sa mga pamilya sang mga OFWs nga yara sa Jordan nga magpabilin kalmado kag ginpasiguro nga hugot kag mabaskog ang koordinasyon sang Embahada sang Pilipinas agud masiguro ang kaluwasan sang kada Pilipino sa rehiyon.
