Sa bahin sang Koronadal, nag-abot na ang election paraphernalia, kag ginalauman nga mangin isa ka mabakod kag mabisi nga semana para sa Comelec samtang nagapadayon ang mga preparasyon para sa nalalapit nga halalan sa Mayo 12, 2025.
Ini ang ginpahayag ni Atty. Maleiha Usman-Loong, Election Officer sang Koronadal City, SA INTERBYU sa Bombo Radyo Koronadal. Suno sa iya, may 147 ka Automated Counting Machines (ACMs) nga ipaidalum sa Final Testing and Sealing (FTS) subong nga Mayo 7, agud masiguro nga tanan nga makina magafunction sang insakto antes pa man ang eleksyon.
Ginpahayag pa niya nga importante ang FTS bilang kabahin sang transparency kag integridad sang eleksyon.
Dugang pa ni Atty. Usman-Loong, wala pa sang ginreport nga kaso sang vote-buying ukon mga insidente nga ginakabig nga delikado, kag sang subong, wala pa sang red category areas nga ginabantayan sa Koronadal. Ini nga development nagahatag sang positibo nga panan-aw sa mas malinong kag hapsay nga eleksyon sa syudad.
Padayon man ang implementasyon sang Oplan Baklas, isa ka programa sang Comelec nga nagatuyo nga kakason ang mga election posters kag campaign materials nga wala nagasunod sa ginahimo nga guidelines sang Omnibus Election Code. Ginapanawagan man sang Comelec sa mga kandidato kag tagasuporta nga sundon ang hustong lugar kag sukat sang mga poster nga ipanubo, agud malikawan ang mga penalidad kag mahatagan sang patas nga tsansa ang tanan nga kandidato.
Ginpa-athag pa ni Atty. Usman-Loong nga ang kooperasyon sang komunidad, mga botante, kag mga kandidato importante gid sa pagpatigayon sang malinong, patas, kag matinlo nga eleksyon sa syudad sang Koronadal.
