KORONADAL CITY – Padayon nga ginahibalo sang Municipal Disaster Risk Reduction and Management Council (MDRRMC) ang kabug-usan nga damyos nga ginbilin sang pagpanalasa sang buhawi sa banwa sang Senator Ninoy Aquino sa Sultan Kudarat.
Ini makaligad nga nawasak sang buhawi ang lima ka puluy-an sa Barangay Bugso samtang ekta-ektarya nga pananum man sang mais kag mga puno sang kahoy ang naguba bangud sa kabaskog sang pagpanalasa sang hangin.
Suno kay Ariel Loria, residente sang nasambit nga banwa, madasig ang hitabo kag wala nila ginalauman nga mangin tuman ka baskog ang hangin nga nag-igo sa ila lugar.
Ginkilala ang mga tag-iya sang puluy-an nga sanday Lito Lentija, Renato Gelapia, Kapitan Roldan Marpaga, Archie Candulo kag Robin Loria sa nasambit nga lugar.
Sa subong, naghatag na sang pauna nga bulig ang MDRRMC -Senator Ninoy Aquino sa mga apektado nga residente.
Samtang, nagpadayon naman ang ginpatigayon nga clearing operation sa mga natumba nga dalagko nga puno sang kahoy.
