KORONADAL CITY – Makabig sa gihapon nga generally peaceful ang Cotabato City, sa pihak sang nagluntad nga pagsigabong sang isa ka bomba sa nasambit nga lugar.
Ini sa tunga sang ginapatigayon nga pag-isip sang boto kaangot sa piniliay kahapon.
Sa interbyu sang Bombo Radyo Koronadal kay P/Col. Michael Lebanan, ang city police director sang Cotabato City PNP, nagsigabong ang nasambit nga bomba sa isa ka bakante nga lote sa bahin sang Prk. Umar Relocation Site, Brgy. Rosary Heights 10.
Maswerte naman nga wala sang napilasan sa nasambit nga pagsigabong apang nagtuga ini sang kahadlok sa mga residente.
Gilayon ini nga ginrespondehan sang mga katapo sang Explosive Ordnance Team (EOD) kag kasamtangan nga ginahibalo kun ano nga klase nga eksplosibo ang gin-usar.
Ginahibalo man suno pa sang mga otoridad kun sin-o ang yara sa likod sang nasambit nga pagpamomba kag kun ano ang motibo sa nasambit nga pagpasigabong.
